ທ່ານ ປອ ທັນສະໄໝ ກົມມະສິດ ລົງຢ້ຽມຢາມ ແລະ ຊຸກຍູ້ວຽກງານ ຢູ່ບໍລິສັດ ດາວທຽມລາວເອເຊຍ-ປາຊີຟິກ ຈຳກັດ (LaoSAT)

ໃນວັນທີ 30 ພະຈິກ 2018 ທ່ານ ທັນສະໄໝ ກົມມະສິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະ ໄດ້ລົງຢ້ຽມຢາມ ແລະ ເຄື່ອນໄຫວຊຸກຍູ້ວຽກງານ ບໍລິສັດ ດາວທຽມລາວເອເຊຍ-ປາຊີຟິກ (LaoSAT) ຢູ່ ສູນບັນຊາການດາວທຽມພາກພື້ນດີນ, ຫຼັກ 14 ຖະໜົນທ່າເດື່ອ, ເມືອງຫາດຊາຍຟອງ, ນະຄອນຫຼວງວຽງຈັນ. ໃຫ້ກຽດຕ້ອນຮັບໂດຍ ທ່ານ ຫຽມ ພົມມະຈັນ ປະທານສະພາບໍລິຫານ ບໍລິສັດ ແລະ ທ່ານ ດີງ ຢ່ອງບີ້ງ ຜູ້ອຳນວຍການໃຫຍ່ບໍລິສັດ ພ້ອມດ້ວຍ ຄະນະອໍານວຍການທັງຝ່າຍລາວ ແລະ ຈີນ.

ໃນໂອກາດນີ້ ທ່ານ ທັນສະໄໝ ກົມມະສິດ ໄດ້ຮັບຟັງການລາຍງານການເຄື່ອນໄຫວວຽກງານຂອງບໍລິສັດໃນໄລຍະທີ່ຜ່ານມາ ແລະ ທິດທາງແຜນການໃນຕໍ່ໜ້າ ຊຶ່ງເຫັນໄດ້ວ່າບໍລິສັດ ໄດ້ມີບາດກ້າວໃນການດຳເນີນທຸລະກິດອັນໃໝ່ ໂດຍສາມາດປະຕິບັດພັນທະໜ້າທີການເມືອງໃນໄລໃໝ່ທີ່ພັກ ແລະ ລັດຖະບານ ໄດ້ມອບໝາຍໃຫ້ໄດ້ເປັນຢ່າງດີ. ມາເຖິງປັດຈຸບັນ ບໍລິສັດໄດ້ບັນລຸຜົນສໍາເລັດໃນການດຳເນີນທຸລະກິດໃນຫຼາຍດ້ານ ເຊັ່ນ: (1) ວຽກງານບໍລິການເຄື່ອງຮັບສັນຍານໂທລະພາບຜ່ານດາວທຽມ (Set Top Box) ມີຜູ້ຊົມໃຊ້ ປະມານ 80,000 ລູກຄ້າ ໃນນັ້ນລວມມີ ລູກຄ້າພາຍໃນ ແລະ ຕ່າງປະເທດຊຶ່ງຍັງມີແຜນຈະເພີ່ມຜູ້ຊົມໃຊ້ໃຫ້ໄດ້ 100,000 ລູກຄ້າໃນທ້າຍປີ 2018 (2) ການບໍລິການສື່ສານຜ່ານດາວທຽມ ທີ່ມີອັດຕາການໃຊ້ ທຣານສະປອນເດີ C-Band ກວມເອົາ 53.37% ແລະ Ku-Band 50%, (3) ການບໍລິການເຄື່ອຂ່າຍອິນເຕີເນັດຄວາມໄວສູງແບບບໍ່ມີສາຍ ຊຶ່ງໄດ້ດໍາເນີນການ ເປີດ 20 ສະຖານີໃໝ່ ໃນຕ່າງແຂວງ ແລະ 60 ສະຖານີ ໃນນະຄອນຫຼວງວຽງຈັນ ຊຶ່ງເລີ່ມທົດລອງເປີດໃຫ້ບໍລິການ ໃນຕົ້ນເດືອນ 11 ປີ 2018 ເປັນຕົ້ນມາ ນອກຈາກນັ້ນທາງ ບໍລິສັດ ຍັງມີແຜນການສ້າງລ່າຍຮັບຈາກ ບໍລິການອື່ນເພີ່ມເຕີມໃນຕໍ່ໜ້າ.

ພ້ອມດຽວກັນນີ້, ທ່ານລັດຖະມົນຕີ ກໍ່ໄດ້ໃຫ້ທິດຊີ້ນໍາ ແລະ ໄດ້ເນັ້ນໜັກໃຫ້ ຄະນະອຳນວຍການ ແລະ ພະນັກງານພາຍໃນບໍລິສັດທຸກຄົນ ໃຫ້ຕັ້ງໜ້າສູ້ຊົນຜ່ານຜ່າບັນດາອຸປະສັກ ແລະ ສິ່ງທ້າທາຍຕ່າງໆ ເພື່ອເຮັດໃຫ້ ບໍລິສັດເຮັດສຳເລັດໜ້າທີການເມືອງ ທີ່ພັກ ແລະ ລັດ ມອບໝາຍໃຫ້ ໂດຍສະເພາະແມ່ນໃຫ້ສາມາດນຳໃຊ້ທ່າແຮງທີ່ມີຂອງ ບໍລິສັດ ຊ່ວຍຍູ້ດັນເສດຖະກິດມະຫາພາກໃຫ້ສາມາດຂັບເຄື່ອນໄປຕາມການຫັນເປັນທັນສະໄໝ ຕາມກົນໄກເສດຖະກິດຕະຫຼາດໃນປັດຈຸບັນ, ປະກອບສ່ວນໃນການພັດທະນາເສດຖະກິດ-ສັງຄົມ, ວັດທະນະທໍາຂອງປະເທດຊາດ ແລະ ການຮ່ວມມືກັບສາກົນໃຫ້ກ້ວາງຂວາງຫຼາຍຂື້ນ. ສ້າງຄວາມສາມັກຄີພາຍໃນ ລະຫວ່າງບຸກຄະລາກອນ ຈີນ ແລະ ລາວ ໃຫ້ສະນິດແໜ້ນ, ເອົາໃຈໃສ່ຂະຫຍາຍຕະຫຼາດໃຫ້ກວ້າງຂວາງທັງພາຍໃນ ແລະ ຕ່າງປະເທດ ໂດຍເນັ້ນໜັກທາງດ້ານຄຸນນະພາບ, ປະສິດທິພາບ ແລະ ລາຄາ ລວມໄປເຖິງຄ່າບໍລິການ, ຄ່າຮັບຊົມ ແລະ ການບໍລິການຫຼັງການຂາຍ ເພື່ອສ້າງຄວາມເພີ່ງພໍໃຈໃຫ້ລູກຄ້າ. ນອກຈາກນີ້, ທ່ານຍັງໄດ້ກ່າວຕື່ມວ່າ: ລັດຖະບານລາວ ກໍ່ຄື ກະຊວງ ປທສ ໃນຖານະຊີ້ນໍາມະຫາພາກ ດາວທຽມລາວ ກໍ່ແມ່ນຊັບສົມບັດທີ່ມີມູນຄ່າສູງຂອງປະເທດຊາດຂອງພວກເຮົາ ຈຶ່ງເປັນຄວາມຮັບຜິດຊອບຂອງທຸກພາກສ່ວນ ໃນການອໍານວຍຄວາມສະດວກ ເປັນຕົ້ນ ທາງດ້ານນະໂຍບາຍ, ນິຕິກໍາ ແລະ ການຮ່ວມມືສາກົນ. ດັ່ງນັ້ນ, ຈຶ່ງຮຽກຮ້ອງໃຫ້ທຸກພາກສ່ວນທັງພາກລັດ ແລະ ເອກະຊົນ ຕະຫຼອດເຖິງປະຊາຊົນລາວບັນດາເຜົ່າ ຈົ່ງສະໜັບສະໜູນໃຫ້ການຮ່ວມມືນໍາໃຊ້ການບໍລິການຂອງ ບໍລິສັດ ຕາມນະໂຍບາຍຂອງລັດຖະບານ ດ້ວຍຜົນສໍາເລັດສູງ.

ຂ່າວ: ຫ້ອງການ: ພະແນກປະຊາສໍາພັນ, ກະຊວງ ປທສ.