ຝຶກອົບຮົມການຄຸ້ມຄອງ, ການນຳໃຊ້ ແລະ ການມອບ-ຮັບເວັບໄຊໃຫ້ ສະຖານີວິທະຍຸ-ໂທລະພາບ ແຂວງອຸດົມໄຊ

ໃນວັນທີ 13 ສິງຫາ 2018 ທີ່ຜ່ານມານີ້, ຄະນະນຳ ແລະ ວິຊາການຈາກ ພະແນກໄປສະນີ,          ໂທລະຄົມມະນາຄົມ ແລະ ການສື່ສານແຂວງ(ປທສ) ນຳໂດຍທ່ານ ສະເຫຼີມ ໄຊຍະວົງ ຮອງຫົວໜ້າ ພະແນກ ປທສ ແຂວງ ໄດ້ນຳພາທີມງານລົງຝຶກອົບຮົມ ການຄູ້ມຄອງ, ການນຳໃຊ້ເວັບໄຊ (ການຝຶກອົບຮົມແມ່ນ ລະຫວ່າງວັນທີ 9-10-/08/2018) ແລະ ພ້ອມທັງເຜີຍແຜ່ນິຕິກຳຈຳນວນໜຶ່ງກ່ຽວກັບວຽກງານ ປທສ  ແລະ ໄດ້ມອບ–ຮັບ ເວັບໄຊ ຢ່າງເປັນທາງການ ລະຫວ່າງ ພະແນກໄປສະນີ,      ໂທລະຄົມມະນາຄົມ ແລະ ການສື່ສານແຂວງ ແລະ ສະຖານີວິທະຍຸ-ໂທລະພາບ ແຂວງອຸດົມໄຊ ໃຫ້ກຽດເຂົ້າຮ່ວມໃນພິທີມອບ-ຮັບເວັບໄຊ (www.odxradio-tv.gov.la ) ໂດຍ ທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ, ຫົວໜ້າພະແນກ ຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ແຂວງອຸດົມໄຊ ມີພະນັກງານ-ລັດຖະກອນເຂົ້າຮ່ວມທັງໝົດ 28 ທ່ານ, ຍິງ 8 ທ່ານ.

ໃນພິທີດັ່ງກ່າວ ທາງຄະນະຮັບຜິດຊອບຈາກພະແນກ ປທສ ແຂວງ ໄດ້ເຜີຍແຜ່ດຳລັດວ່າດ້ວຍການຄູ້ມຄອງຂໍ້ມູນຂ່າວສານຜ່ານອິນເຕີເນັດ, ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງຄອມພີວເຕີ ແລະ ການນຳໃຊ້ສື່ສັງຄົມອອນລາຍໃຫ້ເປັນປະໂຫຍດ ແລະ ປອດໄພ. ຜ່ານການເຜີຍແຜ່ນິຕິກຳກ່ຽວກັບວຽກງານ  ປທສ ເຮັດໃຫ້ພະນັກງານ- ລັດຖະກອນທີ່ເຂົ້າຮ່ວມໄດ້ຮັບຮູ້ ແລະ ເຂົ້າໃຈ ກ່ຽວກັບວຽກງານ ປທສ ຫລາຍຂື້ນ. ຈາກນັ້ນ, ທ່ານ ສະເຫຼີມ ໄຊຍະວົງ ຮອງຫົວໜ້າພະແນກ ປທສ ແຂວງ ໄດ້ກ່າວມອບເວັບໄຊ (www.odxradio-tv.gov.la ) ໃຫ້ ສະຖານີວິທະຍຸ-ໂທລະພາບ ແຂວງ ຢ່າງເປັນທາງການ ແລະ ທ່ານຍັງໄດ້ເວົ້າເຖິງ ຄວາມໝາຍຄວາມສຳຄັນຂອງເວັບໄຊ ໃນສັງຄົມຍຸກປັດຈຸບັນ ການພົວພັນ ຕິດຕໍ່ສື່ສານໄດ້ມີການຂະຫຍາຍຕົວຢ່າງໄວວາ, ດັ່ງນັ້ນ, ການນຳໃຊ້ອິນເຕີເນັດ-ເວັບໄຊ ຈຶ່ງມີຄວາມຈຳເປັນ ແລະ ໄດ້ຮັບຄວາມນິຍົມກັນໃນທົ່ວໂລກ ເຊິ່ງມີບົດບາດສຳຄັນໃນການດຳລົງຊີວິດຂອງມະນຸດເຮົາຫລາຍຂື້ນເລື້ອຍໆ ໂດຍສະເພາະແມ່ນຢູ່ ສປປ ລາວ. ສະນັ້ນ,  ອົງການຈັດຕັ້ງ ນັບທາງພາກລັດ ແລະ ເອກະຊົນ, ຫົວໜ່ວຍທຸລະກິດຕ່າງໆ ຈື່ງມີຄວາມຈຳເປັນໃນການຕິດຕໍ່ສື່ສານຜ່ານລະບົບອິນເຕີເນັດ ແລະ ຈຳເປັນຕ້ອງມີເວັບໄຊເປັນຂອງຕົວເອງ ເພື່ອເປັນການເຜີຍແຜ່ບັນດານິຕິກຳ, ພາລະບົດບາດ, ການເຄື່ອນໄຫວຂອງອົງການຈັດຕັ້ງຂອງຕົນເອງ, ການແລກປ່ຽນຂໍ້ມູນ-ຂ່າວສານ, ເພີ່ມຊ່ອງທາງໃນການໂຄສະນາປະຊາສຳພັນໃຫ້ມີຄວາມສະດວກ, ວ່ອງໄວ ປະຫຍັດເວລາ ແລະ ສາມາດອັບໂຫລດ, ດາວໂຫລດ    ຂໍ້ມູນຂ່າວສານຕ່າງໆ ແລະ ຈະເປັນການກ້າວເຂົ້າສູ່ຍຸກເຕັກໂນໂລຊີ ຂໍ້ມູນ-ຂ່າວສານ ແລະ ການຕິດຕໍ່ສື່ສານທີ່ບໍ່ມີພົມແດນຢ່າງເຕັມຮູບແບບ. ສະນັ້ນການ ອອກແບບ ແລະ ສ້າງເວັບໄຊໃຫ້ ສະຖານີວິທະຍຸ-ໂທລະພາບແຂວງ ໃນຄັ້ງນີ້ ຍັງມີຄວາມຈຳເປັນ ແລະ ມີບົດບາດສຳຄັນທີ່ສຸດ ເພາະວ່າ ວິທະຍຸ-ໂທລະພາບຂອງແຂວງ ເປັນກະບອກສຽງອັນແຫຼມຄົມຂອງພັກ ໃນການໂຄສະນາເຜີຍແຜ່ແນວທາງນະໂຍບາຍຂອງພັກ.
ຫຼັງຈາກນັ້ນ, ທ່ານ ນາງ ວັນສີ ພວງມະໄລ ຜູ້ອຳນວຍການ ສະຖານີວິທະຍຸ-ໂທລະພາບແຂວງອຸດົມໄຊ ໄດ້ຂື້ນກ່າວຮັບເວັບໄຊ ແລະ ກ່າວຄຳຂອບໃຈ ຕໍ່ພະແນກ ປທສ ແຂວງ ທີ່ໄດ້ໃຫ້ການຊ່ວຍເຫຼືອສ້າງ ແລະ ຈັດຝຶກອົບຮົມການຄຸ້ມຄອງ ແລະ ການນຳໃຊ້ເວັບໄຊໃຫ້ ສະຖານີວິທະຍຸ-ໂທລະພາບແຂວງອຸດົມໄຊ ໃນຄັ້ງນີ້  ແລະ ຈະນຳໃຊ້ເວັບໄຊທີ່ສ້າງຂື້ນມານີ້ເພື່ອໝູນໃຊ້ໃຫ້ເກີດປະໂຫຍດສູງສຸດ.

Leave a Reply

Your email address will not be published. Required fields are marked *