ພິທີສະຫຼຸບບັ້ນແຂ່ງຂັນ 3 ດີ ຂອງສະຫະພັນແມ່ຍິງໜ່ວຍ ພະແນກ ປທສ ແຂວງ

ໃນຕອນບ່າຍ ເວລາ 14:00 ນາທີ ຂອງວັນທີ 04/04/2018 ທີ່ຫ້ອງປະຊຸມຂອງພະແນກ ປທສ ແຂວງ ໄດ້ມີການຈັດພິທີສະຫຼຸບບັ້ນແຂ່ງຂັນ 3 ດີ ຂອງສະຫະພັນແມ່ຍິງໜ່ວຍຂື້ນ ໂດຍການເປັນປະທານຮ່ວມຂອງທ່ານ ນາງ ມະນີຈັນ ວິໄລຈິດ ກຳມະການພັກແຂວງ, ປະທານສະຫະພັນແມ່ຍິງແຂວງ, ທ່ານ ຫຸມພັນ ບຸບຜາຄຳ ເລຂາຄະນະພັກຮາກຖານ, ເລຂາໜ່ວຍພັກ ຫົວໜ້າພະແນກ ປທສ ແຂວງ, ທ່ານ ນາງປິ່ນຄຳ ອຸ່ນລະຄອນ ຄະນະພັກຮາກຖານ, ຄະນະໜ່ວຍພັກ, ປະທານສະຫະພັນແມ່ຍິງໜ່ວຍ ພະແນກ ປທສ ແຂວງ, ເຂົ້າຮ່ວມພິທີໃນຄັ້ງນີ້ມີຜູ້ຕາງໜ້າຈາກ 2 ອົງການຈັດຕັ້ງມະຫາຊົນ, ຄະນະໜ່ວຍແມ່ຍີງ 4 ບໍ່ລິສັດ ຜູ້ໃຫ້ບໍລິການດ້ານ ໄປສະນີໂທລະຄົມມະນາຄົມ ແລະ ສະມາຊິກ ພາຍໃນໜ່ວຍເຂົ້າຮ່ວມທັງໝົດ 19 ສະຫາຍ, ຍິງ 16 ສະຫາຍ.

ໃນກອງປະຊຸມຄັ້ງນີ້ ຄະນະຈັດຕັ້ງພິທີ ໄດ້ຜ່ານຂໍ້ຕົກລົງ ວ່າດ້ວຍການອານຸມັດໃຫ້ສະຫະພັນແມ່ຍິງໜ່ວຍພະແນກ ປທສ ແຂວງ ເປີດກອງປະຊຸມສະຫຼຸບຂະບວນແຂ່ງຂັນ 3 ດີ, ຜ່ານຂໍ້ຕົກລົງວ່າດ້ວຍການບົ່ງຕົວແຕ່ງຕັ້ງ ຄະນະສະຫະພັນແມ່ຍິງໜ່ວຍ ພະແນກ ປທສ ແຂວງ ແຕ່ງຕັ້ງ ທ່ານ ນາງ ຄຳ ຄູນປະເສີດ ເປັນຄະນະສະຫະພັນແມ່ຍິງໜ່ວຍ, ໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດ ຂໍ້ແຂ່ງຂັນ 3 ດີ ປະຈຳປີ 2017 ເຊີ່ງໄດ້ມີຜົນງານທີ່ພົ້ນເດັ່ນໃນຫລາຍດ້ານເປັນຕົ້ນແມ່ນ ການຈັດຕັ້ງປະຕິບັດຂໍ້ແຂ່ງຂັນ 3 ດີ ແມ່ນປະຕິບັດຕາມ 4 ບາດກ້າວຄື: 1. ກະກຽມ, 2. ການເປີດຂະບສນການ 3 ດີ, 3. ຕິດຕາມກວດກາ ຊຸກຍູ້ການປະຕິບັດຂໍ້ແຂ່ງຂັນ 3 ດີ, 4. ສະຫຼຸບຕືລນຄາ ແລະ ຍ້ອງຍໍ, ນອກຈາກນີ້ ຍັງໄດ້ປຸກລະດົມ ສະມາຊິກພາຍໃນໜ່ວຍ ແລະ ພະນັກງານລັດຖະກອນພາຍໃນພະແນກ ເຂົ້າເປັນສະມາຊິກກອງທຶນລວມທັງໝົດ 24 ສະຫາຍ ແລະ ສ້າງແຫຼ່ງລາຍຮັບເຂົ້າກອງທຶນໄດ້ 27.438.000 ກີບ/ປີ.

ຈາກນັ້ນທ່ານ ນາງ ມະນີຈັນ ວິໄລຈິດ ໄດ້ຂື້ນມອບໃບຢັ້ງຢືນສະຫະພັນແມ່ຍິງ 3 ດີ ໃຫ້ສະຫະພັນແມ່ຍິງ ໜ່ວຍ ພະແນກ ປທສ ແຂວງ ແລະ ໄດ້ໂອ້ລົມຕໍ່ພິທີໃນຄັ້ງນີ້ ເຊີ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ແລະ ໃຫ້ສືບຕໍ່ຮັກສາມູນເຊື້ອໄວ້, ນອກຈາກນີ້ທ່ານຍັງໄດ້ເນັ້ນໜັກໃຫ້ສະມາຊິກພາຍໃນໜ່ວຍສືບຕໍ່ຈັດຕັ້ງປະຕິບັດບາງດ້ານຄື:
ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ສະມາຊິກພາຍໃນໜ່ວຍ ໄດ້ຮັບຮູ້ ແລະ ເຂົ້າໃຈ ຕໍ່ແນວທາງນະໂຍບາຍຂອງພັກລັດ.
ເຕົ້າໂຮມຄວາມສາມະຄີ ຕຳນິສົ່ງຂ່າວຊ່ວຍເຫຼືອເຊີ່ງກັນ ແລະ ກັນ.
ປະຕິບັດຕາມແຜນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍ ໃຫ້ບັນລຸຕາມເປົ້າໝາຍທີ່ວາງໄວ້.

ຕ້ານ ແລະ ສະກັດກັ້ນປະກົດການຫຍໍ້ທໍ້ໃນສັງຄົມ, ລະມັດລະວັງໃນການນຳໃຊ້ສື່ສັງຄົມອອນໄລ.
ໃນຕອນທ້າຍຂອງພິທີ ທ່ານນາງປິ່ນຄຳ ອຸ່ນລະຄອນ ໄດ້ຂື້ນຮັບຄຳໂອວາດຕັກເຕືອນຈາກຂັ້ນເທີງ ແລະ ໄດ້ສະແດງຄວາມຮູ້ບຸນຄຸນ ທີ່ທ່ານໄດ້ຊີ້ທິດເຍືອງທາງໃນການຈັດຕັ້ງປະຕິບັດວຽກງານໃນຕໍ່ໜ້າ ແລະ ຈະປະຕິບັດໃຫ້ໄດ້ຮັບຜົນດີຂື້ນເທື່ອລະກ້າວ.
ພິທີດັ່ງກ່າວໄດ້ດຳເນີນມາເປັນເວລາ 1 ຕອນກໍ່ໄດ້ສີ້ນສຸດລົງ.