ພິທີຝຶກອົບຮົມ ການຄຸ້ມຄອງ-ນຳໃຊ້ ເວັບໄຊຫ້ອງວ່າການປົກຄອງ ເມືອງປາກແບງ ແຂວງອຸດົມໄຊ

ໃນລະຫວ່າງວັນທີ 4-5 ກັນຍາ 2018 ທີ່ຜ່ານມານີ້ ຄະນະນຳ ແລະ ວິຊາການຈາກພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ນຳໂດຍ ທ່ານ ສົມບຸນ ມະນີ ຮອງເລຂາຄະນະພັກຮາກຖານ ຮອງຫົວໜ້າ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ໄດ້ນຳພາທີມງານລົງຝຶກອົບຮົມການຄູ້ມຄອງ-ນຳໃຊ້ເວັບໄຊ ແລະ ພ້ອມທັງເຜີຍແຜ່ນິຕິກຳຈຳນວນໜຶ່ງກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານ ແລະ ໄດ້ມອບ – ຮັບ ເວັບໄຊ ຢ່າງເປັນທາງການ ລະຫວ່າງ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ແລະ ຫ້ອງວ່າການປົກຄອງເມືອງປາກແບງ ແຂວງອຸດົມໄຊ ໃຫ້ກຽດເຂົ້າຮ່ວມຮັບເວັບໄຊ www.muangpakbeng-odx.gov.la ໂດຍທ່ານ ຄຳດີ ກຸນໄຊຍະທຳ ຄະນະປະຈຳພັກເມືອງ ຮອງເຈົ້າເມືອງໆປາກແບງ, ມີຄະນະນຳ ແລະ ພະນັກງານ-ລັດຖະກອນເຂົ້າຮ່ວມທັງໝົດ 46 ທ່ານ, ຍິງ 11 ທ່ານ.
ໃນພິທີດັ່ງກ່າວທາງຄະນະຮັບຜິດຊອບຈາກພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ໄດ້ຈັດຝຶກອົບຮົມການຄຸ້ມຄອງ-ນຳໃຊ້ເວັບໄຊ, ເຜີຍແຜ່ກົດໝາຍວ່າດ້ວຍການໂທລະຄົມມະນາຄົມ, ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງຄອມພິວເຕີ ແລະ ດຳລັດວ່າດ້ວຍການຄູ້ມຄອງຂໍ້ມູນຂ່າວສານຜ່ານລະບົບອິນເຕີເນັດ. ຜ່ານການເຜີຍແຜ່ນິຕິກຳກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານ ໄດ້ເຮັດໃຫ້ພະນັກງານ- ລັດຖະກອນທີ່ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈກ່ຽວກັບວຽກງານໄປສະນີ, ໂທລະຄົມມະນາຄົມ ແລະ ການສື່ສານຫລາຍຂື້ນ ໂດຍສະເພາະແມ່ນການນຳໃຊ້ສື່ອອນລາຍ ແລະ ການເຜີຍແຜ່ຂໍ້ມູນຂ່າວສານຜ່ານລະບົບອິນເຕີເນັດເພື່ອໃຫ້ຖືກຕ້ອງຕາມລະບຽບ-ກົດໝາຍທີ່ໄດ້ກຳນົດໄວ້.
ໃນພິທີ ທີ່ມີຄວາມໝາຍຄວາມສຳຄັນຄັ້ງນີ້, ທ່ານ ສົມບຸນ ມະນີ ໄດ້ກ່າວມອບເວັບໄຊ www.muangpakbeng-odx.gov.la ) ໃຫ້ຫ້ອງວ່າການປົກຄອງເມືອງປາກແບງຢ່າງເປັນທາງການ ແລະ ທ່ານຍັງໄດ້ເວົ້າເຖິງ ຄວາມໝາຍຄວາມສຳຄັນຂອງເວັບໄຊ ໃນສັງຄົມປະຈຸບັນ ການພົວພັນຕິດຕໍ່ສື່ສານໄດ້ມີການຂະຫຍາຍຕົວຢ່າງໄວວາ. ດັ່ງນັ້ນ, ການນຳໃຊ້ອິນເຕີເນັດ ແລະ ເວັບໄຊຈຶ່ງໄດ້ຮັບຄວາມນິຍົມກັນໃນທົ່ວໂລກ ແລະ ມີບົດບາດສຳຄັນໃນການດຳລົງຊີວິດຂອງມະນຸດ, ການພັດທະນາເສດຖະກິດ-ສັງຄົມ ຂອງບັນດາປະເທດຕ່າງໆໃນທົ່ວໂລກ ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ສະນັ້ນ, ອົງການຈັດຕັ້ງນັບທາງພາກລັດ ແລະ ເອກະຊົນ, ຫົວໜ່ວຍທຸລະກິດຕ່າງໆ ຈື່ງມີຄວາມຈຳເປັນໃນການຕິດຕໍ່ສື່ສານຜ່ານລະບົບອິນເຕີເນັດ ແລະ ຈຳເປັນຕ້ອງມີເວັບໄຊເປັນຂອງຕົວເອງ ເພື່ອເປັນການເຜີຍແຜ່ຂໍ້ມູນຂ່າວສານ, ບັນດານິຕິກຳ, ພາລະບົດບາດ, ການເຄື່ອນໄຫວຂອງອົງການຈັດຕັ້ງຂອງຕົນເອງ,  ການແລກປ່ຽນຂໍ້ມູນ-ຂ່າວສານ, ເພື່ອເພີ່ມຊ່ອງທາງໃນການໂຄສະນາປະຊາສຳພັນໃຫ້ມີຄວາມສະດວກ, ວ່ອງໄວປະຫຍັດເວລາ ແລະ ສາມາດອັບໂຫລດ, ດາວໂຫລດເອະກະສານ ແລະ ຂໍ້ມູນຕ່າງໆໄດ້ ເຊິ່ງຈະເປັນການກ້າວເຂົ້າສູ່ລະບົບເຕັກໂນໂລຊີຂໍ້ມູນ-ຂ່າວສານ ແລະ ການຕິດຕໍ່ສື່ສານທີ່ບໍ່ມີພົມແດນຢ່າງເຕັມຮູບແບບ. ສະນັ້ນ, ການອອກແບບ ແລະ ສ້າງເວັບໄຊ ໃຫ້ຫ້ອງວ່າການປົກຄອງເມືອງປາກແບງ ໃນຄັ້ງນີ້ ຈຶ່ງເປັນວຽກງານໜື່ງທີ່ຈຳເປັນ ແລະ ມີບົດບາດສຳຄັນທີ່ສຸດເພື່ອນຳໃຊ້ເປັນສື່ໃນການເຜີຍແຜ່ຂໍ້ມູນຂ່າວສານ ແລະ ປະຊາສຳພັນເພື່ອຮັບໃຊ້ວຽກງານຕ່າງໆໃຫ້ມີປະສິດທິຜົນດີຂຶ້ນເລື້ອຍໆ.
ຫຼັງຈາກນັ້ນ, ທ່ານ ຄຳດີ ກຸນໄຊຍະທຳ ໄດ້ຂື້ນກ່າວຮັບເວັບໄຊ ແລະ ກ່າວຄຳຂອບໃຈ ຕໍ່ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ທີ່ໄດ້ໃຫ້ການຊ່ວຍເຫຼືອສ້າງ ແລະ ຈັດຝຶກອົບຮົມການຄຸ້ມຄອງ-ນຳໃຊ້ເວັບໄຊ     ຫ້ອງວ່າການປົກຄອງເມືອງປາກແບງ  ແລະ ຈະນຳໃຊ້ເວັບໄຊ ທີ່ສ້າງຂື້ນມານີ້ເພື່ອໄປຮັບໃຊ້ວຽກງານໃຫ້ເກີດປະໂຫຍດສູງສຸດ.