ພິທີຝຶກອົບຮົມການຄຸ້ມຄອງ, ການນຳໃຊ້ ແລະ ມອບ-ຮັບເວັບໄຊ ຫ້ອງວ່າການປົກຄອງເມືອງຫຼາ

ໃນລະຫວ່າງວັນທີ 5-6 ເມສາ 2018 ທີ່ຜ່ານມານີ້ ຄະນະທີມງານຈາກ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ນຳໂດຍທ່ານ ສະເຫຼີມ ໄຊຍະວົງ ຮອງຫົວໜ້າ ພະແນກ ໄປສະນີ, ໂທລະຄົມມະນາຄົມ ແລະ   ການສື່ສານແຂວງ ໄດ້ນຳພາທີມງານລົງຝຶກອົບຮົມການຄູ້ມຄອງ, ການນຳໃຊ້ເວັບໄຊ ແລະ ພ້ອມທັງເຜີຍແຜ່ນິຕິກຳຈຳນວນໜຶ່ງ ກ່ຽວກັບວຽກງານ ໄປສະນີ, ໂທລະຄົມມະນາຄົມ ແລະ ການສື່ສານ  ແລະ ໄດ້ມອບ – ຮັບ ເວັບໄຊ ຢ່າງເປັນທາງການ ລະຫວ່າງ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ແລະ ຫ້ອງວ່າການປົກຄອງເມືອງຫຼາ       ແຂວງອຸດົມໄຊ ໃຫ້ກຽດເຂົ້າຮ່ວມຮັບເວັບໄຊ (www.muangla-odx.gov.la ) ໂດຍທ່ານ ນາງ ສົມລີ ສີອ່ອນຕາ ຄະນະປະຈຳພັກເມືອງ ຮອງເຈົ້າເມືອງໆຫຼາ, ມີພະນັກງານ-ລັດຖະກອນເຂົ້າຮ່ວມທັງໝົດ 32 ທ່ານ, ຍິງ 12 ທ່ານ.

ໃນພິທີດັ່ງກ່າວ ທາງຄະນະຮັບຜິດຊອບຈາກພະແນກ ໄປສະນີ, ໂທລະຄົມມະນາຄົມ ແລະ ການສື່ສານ ແຂວງ  ໄດ້ຈັດຝຶກອົບຮົມການຄຸ້ມຄອງ, ການນຳໃຊ້ເວັບໄຊ,  ເຜີຍແຜ່ດຳລັດ ວ່າດ້ວຍການຄູ້ມຄອງຂໍ້ມູນຂ່າວສານ ຜ່ານລະບົບອິນເຕີເນັດ ແລະ ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງຄອມພີວເຕີ. ຜ່ານການເຜີຍແຜ່ນິຕິກຳ ກ່ຽວກັບວຽກງານ ໄປສະນີ, ໂທລະຄົມມະນາຄົມ ແລະ ການສື່ສານ ເຮັດໃຫ້ພະນັກງານ- ລັດຖະກອນທີ່ເຂົ້າຮ່ວມ         ໄດ້ຮັບຮູ້ ແລະ ເຂົ້າໃຈ ກ່ຽວກັບວຽກງານ ໄປສະນີ, ໂທລະຄົມມະນາຄົມ ແລະ ການສື່ສານຫລາຍຂື້ນ.
ຈາກນັ້ນ, ທ່ານ ສະເຫຼີມ ໄຊຍະວົງ ໄດ້ກ່າວມອບເວັບໄຊ (www.muangla-odx.gov.la ) ໃຫ້ຫ້ອງວ່າການປົກຄອງເມືອງຫຼາ ຢ່າງເປັນທາງການ ແລະ ທ່ານຍັງໄດ້ເວົ້າເຖິງ ຄວາມໝາຍຄວາມສຳຄັນຂອງເວັບໄຊ ໃນສັງຄົມປະຈຸບັນ ການພົວພັນຕິດຕໍ່ສື່ສານໄດ້ມີການຂະຫຍາຍຕົວຢ່າງໄວວາດັ່ງນັ້ນ, ການນຳໃຊ້ອິນເຕີເນັດ ແລະ ເວັບໄຊຈຶ່ງໄດ້ຮັບຄວາມນິຍົມກັນໃນທົ່ວໂລກ ແລະ ມີບົດບາດສຳຄັນໃນການ   ດຳລົງຊີວິດຂອງມະນຸດເຮົາຫລາຍຂື້ນເລື້ອຍໆ. ສະນັ້ນ,            ອົງການຈັດຕັ້ງນັບທາງພາກລັດ ແລະ ເອກະຊົນ, ຫົວໜ່ວຍທຸລະກິດຕ່າງໆ ຈື່ງມີຄວາມຈຳເປັນໃນການຕິດຕໍ່ສື່ສານຜ່ານລະບົບອິນເຕີເນັດ ແລະ ຈຳເປັນຕ້ອງມີເວັບໄຊເປັນຂອງຕົວເອງ ເພື່ອເປັນການເຜີຍແຜ່ຂໍ້ມູນຂ່າວສານ, ບັນດານິຕິກຳ, ພາລະບົດບາດ, ການເຄື່ອນໄຫວຂອງອົງການຈັດຕັ້ງຂອງຕົນເອງ,   ການແລກປ່ຽນຂໍ້ມູນ-ຂ່າວສານ, ເພື່ອເພີ່ມຊ່ອງທາງໃນການໂຄສະນາປະຊາສຳພັນໃຫ້ມີຄວາມສະດວກ, ວ່ອງໄວປະຫຍັດເວລາ ແລະ ສາມາດອັບໂຫລດ, ດາວໂຫລດຟາຍເອະກະສານ ແລະ ຂໍ້ມູນຕ່າງໆໄດ້ ເຊິ່ງຈະເປັນການກ້າວເຂົ້າສູ່ລະບົບ  ເຕັກໂນໂລຊີຂໍ້ມູນ-ຂ່າວສານ ແລະ ການຕິດຕໍ່ສື່ສານທີ່ບໍ່ມີພົມແດນຢ່າງເຕັມຮູບແບບ. ສະນັ້ນ, ການອອກແບບ ແລະ ສ້າງເວັບໄຊ ໃຫ້ຫ້ອງວ່າການປົກຄອງເມືອງຫຼາ ໃນຄັ້ງນີ້ ຈຶ່ງເປັນວຽກງານໜື່ງ ທີ່ຈຳເປັນ ແລະ ມີບົດບາດສຳຄັນທີ່ສຸດ.
ຫຼັງຈາກນັ້ນ ທ່ານ ນາງ ສົມລີ ສີອ່ອນຕາ ໄດ້ຂື້ນກ່າວຮັບເວັບໄຊ ແລະ ກ່າວຄຳຂອບໃຈ ຕໍ່ພະແນກ ໄປສະນີ, ໂທລະຄົມມະນາຄົມ ແລະ ການສື່ສານແຂວງ ທີ່ໄດ້ໃຫ້ການຊ່ວຍເຫຼືອສ້າງ ແລະ ຈັດຝຶກອົບຮົມການນຳໃຊ້ເວັບໄຊ     ຫ້ອງວ່າການປົກຄອງເມືອງຫຼາ  ແລະ ຈະນຳໃຊ້ເວັບໄຊ ທີ່ສ້າງຂື້ນມານີ້ເພື່ອໄປນຳໃຊ້ໃຫ້ເກີດປະໂຫຍດສູງສຸດ.