ພິທີປະກາດແຕ່ງຕັ້ງຮອງຫົວໜ້າພະແນກ ໄປສະນີ ໂທລະຄົມມະນາຄົມ ແລະ ການສື່ສານ ແຂວງອຸດົມໄຊ ໄດ້ຈັດຂຶ້ນໃນຕອນບ່າຍ ວັນທີ 31 ມັງກອນ 2019 ຢູ່ທີ່ຫ້ອງປະຊຸມຂອງພະແນກ ປທສ ແຂວງ ໂດຍການເຂົ້າຮ່ວມຂອງ ທ່ານ ພົມມາ ວັນນະກຳ ກຳມະການພັກແຂວງ, ຮອງຫົວໜ້າຄະນະຈັດຕັ້ງແຂວງ.

IMG_8398.JPG

  ການປະການແຕ່ງຕັ້ງໃນຄັ້ງນີ້ ກໍເພື່ອເປັນການປັບປຸງກົງຈັກການຈັດຕັ້ງໃຫ້ສອດຄ່ອງກັບໜ້າວຽກຕົວຈິງ ແນ່ໃສ່ເຮັດໃຫ້ການເຄື່ອນໄຫວວຽກງານມີປະສິດທິພາບ,ປະສິດທິຜົນ ແລະ ສຳເລັດຕາມແຜນການ,ເຮັດໃຫ້ລະບົບກົງຈັກການຈັດຕັ້ງມີຄວາມສົມບູນ ເນື່ອງຈາກທ່ານ ສະເຫຼີມ ໄຊຍະວົງ ອາດີດຮອງຫົວໜ້າພະແນກ ໄປສະນີ ໂທລະຄົມມະນາຄົມ ແລະ ການສື່ນສານ ໄດ້ພັກຜ່ອນຮັບອຸດໜູນບຳນານ ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງອຸດົມໄຊ ວ່າດ້ວຍການອະນຸມັດໃຫ້ພະນັກງານ - ລັດຖະກອນພັກຜ່ອນຮັບອຸດໜູນບຳນານ. ດັ່ງນັ້ນ ແຂວງອຸດົມໄຊ ຈຶ່ງອອກຂໍ້ຕົກລົງແຕ່ງຕັ້ງ ທ່ານ ນາງ ປິ່ນຄຳ ອຸ່ນລະຄອນ ເປັນຮອງຫົວໜ້າພະແນກ ປທສ ແຂວງ ເພື່ອສືບຕໍ່ເຄື່ອນໄຫວຈັດຕັ້ງປະຕິບັດວຽກງານຕາມພາລະບົດບາດ ພ້ອມທັງໃຫ້ປະຕິບັດເງິນອຸດໜູນຕໍາແໜ່ງບໍລິຫານປະເພດ 4 ຕາມດຳລັດຂອງນາຍົກລັດຖະມົນຕີ.

  ໃນໂອກາດດັ່ງກ່າວ ຄະນະພະແນກ ປທສ ແຂວງ ໄດ້ປະຕິບັດນະໂຍບາຍຕໍ່ກັບທ່ານ ສະເຫຼີມ ໄຊຍະວົງ ທີ່ພັກຜ່ອນ ຮັບອຸດຫນູນບຳນານ ລວມທັງພາກສ່ວນຕ່າງໆ ກໍໄດ້ນຳເອົາຂອງຂວັນ ເຂົ້າອວຍພອນ.

IMG_8340.JPG

  ຕອນທ້າຍຂອງພິທີ ກໍໄດ້ຮັບຟັງການໂອ້ລົມຂອງ ທ່ານ ພົມມາ ວັນນະກໍາ ກໍາມະການພັກແຂວງ,ຮອງຫົວໜ້າຄະນະຈັດຕັ້ງແຂວງ ເພື່ອເຮັດໃຫ້ພິທີດັ່ງກ່າວມີຄວາມສົມບູນ ແລະ ເປັນແນວທາງສຳຄັນໃຫ້ແກ່ຜູ້ທີ່ໄດ້ຮັບການແຕ່ງຕັ້ງໃຫມ່ຈັດຕັ້ງປະຕິບັດ.

  ພິທີໃນຄັ້ງນີ້ ມີທ່ານ ຫຸມພັນ ບຸບຜາຄໍາ ເລຂາຄະນະພັກຮາກຖານ,ຫົວໜ້າພະແນກ ປທສ ແຂວງ,ບັນດາພະແນກການ,ຕາງໜ້າບໍລິສັດທີ່ຂຶ້ນກັບພະແນກ ປທສ ແລະ ພະ ນັກງານລັດຖະກອນ ພາຍໃນພະແນກດັ່ງກ່າວ ເຂົ້າຮ່ວມ.