ໃນຕອນເຊົ້າ ຂອງວັນທີ 28 ມິຖຸນາ 2019 ທີ່ຜ່ານມານີ້ ຢູ່ທີ່ຫ້ອງປະຊຸມຂອງພະແນກ ໄປສະນີ, ໂທລະຄົມມະນາຄົມ ແລະ ການສື່ສານ ໄດ້ມີ ພິທີ ມອບ - ຮັບ ໜ້າທີ່ ຫົວໜ້າ ພະແນກ ໄປສະນີ, ໂທລະຄົມມະນາຄົມ ແລະ ການສື່ສານ ລະຫວ່າງ ຜູ່ເກົ່າ ແລະ ຜູ່ໃໝ, ໂດຍການເປັນກຽດເຂົ້າຮ່ວມຂອງທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ ຜູ່ຊີ້ນຳວຽກງານຂົງເຂດ ປທສ, ໃນພິທີຄັ້ງນີ້ມີບັນດາທ່ານ ແຂກເຊີນຈາກ ຄະນະຈັດຕັ້ງແຂວງ, ຄະນະກວດກາແຂວງ, ຄະນະໂຄສະນາອົບຮົມແຂວງ, ພະແນກພາຍໃນແຂວງ, ຄະນະພະແນກ ປທສ, ພະແນກການຕ່າງໆອ້ອມຂ້າງແຂວງ ແລະ ເມືອງ, ບັນດາຄະນະອຳນວຍການສາຂາ ບໍລິສັດຜູ້ໃຫ້ບໍລິການດ້ານໄປສະນີ, ໂທລະຄົມ 5 ບໍລິສັດ ຕະຫລອດຮອດພະນັກງານລັດຖະກອນພາຍໃນພະແນກ ປທສ ແຂວງ ເຂົ້າຮ່ວມທັງໝົດ ຈຳນວນ 52 ທ່ານ.

dptdirectorrenewpositionassignment.jpeg

          ການມອບ - ຮັບ ໜ້າທີ່ໃນຄັ້ງນີ້ ແມ່ນແນໃສ່ເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານດຳເນີນໄປຢ່າງມີປະສິດທິພາບ ແລະ ເປັນລະບົບຢ່າງຕໍ່ເນື່ອງ, ທັງເປັນການກະກຽມດຳເນີນກອງປະຊຸມໃຫຍ່ 3 ຂັ້ນຂອງແຂວງ.

          ໃນພິທີໄດ້ຜ່ານຂໍ້ຕົກລົງຂອງທ່ານເຈົ້າແຂວງ ແຂວງອຸດົມໄຊ ສະບັບເລກທີ 514/ຈຂ.ອຊ, ລົງວັນທີ 24 ມິຖຸນາ 2019 ວ່າດ້ວຍການໂຍກຍ້າຍພະນັກງານລັດຖະກອນ, ໂຍກຍ້າຍທ່ານ ຫຸມພັນ ບຸບຜາຄຳ ຫົວໜ້າພະແນກ ປທສ ຜູ່ເກົ່າ ໄປປະຈຳການ ແລະ ຮັບໜ້າທີ່ໃໝ່ຢູ່ຫ້ອງວ່າການປົກຄອງເມືອງຫຼາ ແຂວງອຸດົມໄຊ ແລະ ຂໍ້ຕົກລົງຂອງທ່ານເຈົ້າແຂວງ ແຂວງອຸດົມໄຊ ສະບັບເລກທີ 513/ຈຂ.ອຊ, ລົງວັນທີ 24 ມິຖຸນາ 2019 ວ່າດ້ວຍການແຕ່ງຕັ້ງຫົວໜ້າພະແນກ ປທສ ແຂວງ ຜູ່ໃໝ່ ໂດຍແຕ່ງຕັ້ງທ່ານ ສຸວັດ ມະຫາວົງສະນັ່ນ ກຳມະການພັກແຂວງ ເປັນ ຫົວໜ້າພະແນກ ປທສ ຜູ່ໃໝ່.

          ທ່ານ ຫຸມພັນ ບຸບຜາຄຳ ຫົວໜ້າພະແນກ ປທສ ຜູ່ເກົ່າ ໄດ້ຕີລາຄາຄືນການຈັດຕັ້ງປະຕິບັດວຽກງານຮອບດ້ານ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ແລະ ເຊັນ ມອບ - ຮັບ ໜ້າທີ່ຢ່າງເປັນທາງການ ລະຫວ່າງຫົວໜ້າ ຜູ່ເກົ່າ ແລະ ຜູ່ໃໝ່ ໂດຍມີທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ ຜູ່ຊີ້ນຳວຽກງານຂົງເຂດ ປທສ, ບັນດາອົງການຈັດຕັ້ງທີ່ກ່ຽວຂ້ອງ, ຕະຫລອດຮອດພະນັກງານລັດຖະກອນພາຍໃນພະແນກ ປທສ ແຂວງ ເຂົ້້າຮ່ວມເປັນສັກຂີພະຍານ.

          ໃນຕອນທ້າຍຂອງພິທີ ທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ ຜູ່ຊີ້ນຳວຽກງານຂົງເຂດ ປທສ ໄດ້ມີຄຳຄິດເຫັນໂອ້ລົມ ເພື່ອເປັນເຂັມຊີ້ທິດເຍືອງທາງ  ໃນການຈັດຕັ້ງປະຕິບັດວຽກງານໃນຕໍ່ໜ້າ ໃຫ້ມີຜົນສຳເລັດເປັນກ້າວໆຂື້ນ.

          ພິທີດັ່ງກ່າວດຳເນີນມາເປັນເວລາ 1 ຕອນກໍ່ໄດ້ສີ້ນສຸດລົງດ້ວຍຜົນສຳເລັດອັນຈົບງາມ.