ກອງປະຊຸມວຽກງານຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ ປະຈຳປີ 2018 ໃນລະຫວ່າງ      ວັນທີ 1-2 ເມສາ 2019 ໄດ້ອັດລົງດ້ວຍຜົນສໍາເລັດອັນຈົບງາມ ທີ່ສູນການຮ່ວມມືສາກົນ ແລະ ຝຶກອົບຮົມລາວ-ຢີ່ປຸ່ນ(ICTC), ນະຄອນຫຼວງວຽງຈັນ ໃນຕອນສວຍຂອງວັນທີ 02 ເມສາ 2019 ຜ່ານມານີ້, ໂດຍການເປັນປະທານຂອງ ທ່ານ ສົມດີ ດວງດີ ກຳມະການສູນກາງພັກ, ຮອງນາຍົກ ລັດຖະມົນຕີ, ລັດຖະມົນຕີກະຊວງການເງິນ, ມີບັນດາທ່ານຮອງລັດຖະມົນຕີ, ຄະນະກົມ/ທຽບເທົ່າ ແລະ ຄະນະພະແນກ ປທສ ແຂວງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

mpt-annually-meeting-2018.png

ໃນກອງປະຊຸມ, ທ່ານ ປອ ທັນສະໄໝ ກົມມະສິດ ລັດຖະມົນຕີກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ລາຍງານຜົນຂອງກອງປະຊຸມວຽກງານຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ ປະຈຳປີ 2018 ແລະ ທິດທາງແຜນການ ປະຈໍາປີ 2019 ​ຊຶ່ງ​ຈະ​ໄດ້​ສືບ​ຕໍ່ຈັດຕັ້ງຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ໃຫ້ເປັນອັນລະອຽດ ໃນຂົງເຂດໄປສະນີ, ໂທລະຄົມມະນາຄົມ ແລະ ການສື່ສານ ​ເພື່ອເຮັດໃຫ້ວຽກງານດັ່ງກ່າວ ກາຍເປັນກຳລັງຂັບເຄື່ອນທີ່ແຂງແຮງ ເຂົ້າໃນການພັດທະນາເສດຖະກິດ-ສັງຄົມ, ວັດທະນະທຳ, ສິ່ງແວດລ້ອມ, ວຽກງານປ້ອງກັນຊາດ ແລະ ປ້ອງກັນຄວາມສະຫງົບ, ການ​ເຊື່ອມ​ໂຍງກັບພາກພື້ນ ແລະ ສາກົນ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ກອງປະຊຸມ ຊຶ່ງກ່ອນອຶ່ນໝົດ ທ່ານໄດ້ສະແດງຄວາມຍ້ອງຍໍ, ຊົມເຊີຍ ຕໍ່ຄໍາຂວັນຂອງກອງປະຊຸມ ໃນຫົວຂໍ້: “ສົ່ງເສີມ ແລະ ຫັນການຄຸ້ມຄອງລັດດ້ວຍລະບົບດີຈິຕອນ” ທີ່​ສ່ອງ​ແສງ​ເຖິງຄວາມ​ຮັບ​ຜິດ​ຊອບ​ ຂອງທຸກ​ຂະ​ແໜງ​ການ ​ຕໍ່ວ​ຽກ​ງານ​ໄອ​ຊີ​ທີ ແລະ ສຸມໃສ່ ຈັດຕັ້ງປະຕິບັດແຜນພັດທະນາຂະແໜງ ປທສ 5 ປີ ຄັ້ງທີ II (2016-2020) ດ້ວຍບັນຍາກາດຄຶກຄື້ນ ແລະ ມີຜົນສຳເລັດຢ່າງໜ້າເພິ່ງພໍໃຈຫຼາຍປະການ. ປັດຈຸບັນ, ພະນັກງານ-ລັດຖະກອນ ກໍ່ຄືກະຊວງ ປທສ ກຳລັງສຸມໃສ່ ກະກຽມເປີດງານວາງສະແດງ ໄອຊີທີ 2019, ກະກຽມເປັນເຈົ້າພາບ ຈັດກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19 ແລະ ກອງປະຊຸມເຈົ້າໜ້າທີ່ອາວຸດໂສ ໄອຊີທີ ອາຊຽນ ຄັ້ງທີ 20 ໃນທ້າຍປີ 2019 ນີ້, ເຊິ່ງເປັນການສ້າງທ່າແຮງໃຫ້ວຽກງານເຕັກໂນໂລຊີການສື່ສານ ຂໍ້ມູນຂ່າວສານ (ICT) ໃນ ສ ປ ປ ລາວ ຂອງ ພວກເຮົາ ນັບມື້ ນັບເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ. ນອກນີ້, ທ່ານຍັງໄດ້ຍົກໃຫ້ເຫັນເຖິງການນໍາໃຊ້ ລະບົບເຕັກໂນໂລຊີການສື່ສານຂໍ້ມູນຂ່າວສານ (ICT) ເຊິ່ງໄດ້ກາຍເປັນ ຄວາມຈຳເປັນສຳລັບທຸກກະຊວງ ແລະ ຂະແໜງການ ຢ່າງຫຼີກລ້ຽງບໍ່ໄດ້. ດັ່ງນັ້ນ, ການສ້າງລັດເອເລັກໂຕຣນິກຂະແໜງການຕົນ ຈຶ່ງສະທ້ອນໃຫ້ເຫັນເຖິງຄວາມເອົາໃຈໃສ່ ຢ່າງຈິງຈັງ ຂອງ ຄະນະພັກ, ຄະນະນຳ ຂະແໜງການນັ້ນໆ ເພື່ອຍົກສູງຄຸນ​ນະພາບ ແລະ ຄວາມໂປ່ງໃສ, ໂດຍສະເພາະ ຂະແໜງເສດຖະກິດ ເຊັ່ນ : e-commerce, e-tax, e-payment ລວມທັງ​ education. ສະນັ້ນ, ​​ບັນ​ດາກະ​ຊວງ ແລະ ຂະ​ແໜງ​ການ​​ຕ້ອງ​ຮ່ວມ​ມືກັບ ກະຊວງ ປທສ ນຳໃຊ້​ພື້ນ​ຖານ​ໂຄງ​ລ່າງຮ່ວມກັນ ເພື່ອຫຼີກລ້ຽງການລົງທຶນຊ້ຳຊ້ອນ ແລະ ປົກ​ປ້ອງ​ຂໍ້​ມູນ​ຂ່າວ​ສານ​ຂອງ​ບັນ​ດາ​ກະ​ຊວງ ແລະ ຂະ​ແໜງ​ການ ເປັນ​ຕົ້ນ​ແມ່ນ ສະກັດ​ກັ້ນ​ການ​ທຳ​ລາຍ​, ການ​ໂຈ​ລະ​ກຳ​ຂໍ້​ມູນ​ຂ່າວ​ສານ, ສະ​ກັດ​ກັ້ນ​ຂໍ້​ມູນ​ທີ່​ເປັນ​ໄພຕໍ່ຄວາມໝັ້ນຄົງຂອງຊາດ. ລັດ​ຖະ​ບານ, ກໍ່​ຄື​ກະ​ຊວງ ປທສ ໄດ້ສ້າງ​ໃຫ້ ສ​ປ​ປ ລາວ ​ມີ​ສູນ​ຂໍ້​ມູນ​ຂ່າວ​ສານແຫ່ງຊາດ ໃນການຄຸ້ມຄອງຂໍ້ມູນໃຫ້ມີຄວາມປອດໄພ​ ເພື່ອ​ເປັນ​ບ່ອນ​ຮັບ​ຝາກ  ​ຂໍ້​ມູນ​ເອ​ເລັກ​ໂຕຼນິກ. ສະ​ນັ້ນ, ກະຊວງ ປທສ ໃນຖານະເປັນຜູ້ຄຸ້ມຄອງມະຫາພາກ ແລະ ເປັນໃຈກາງໃນການປະສານງານ ແລະ ຮ່ວມມື ຂອງພາກສ່ວນຕ່າງໆ ຈະຕ້ອງມີແຜນການ, ໂຄງການລະອຽດ ເພື່ອຈັດຕັ້ງປະຕິບັດ ແລະ ເອົາໃຈໃສ່ເປັນພິເສດ ໃນການຫັນເປັນທັນສະໄໝ ຍົກ​ສູງປະສິດ​ທິຜົນໃນການໃຫ້ການບໍລິຫານ, ​ການ​ໃ​ຊ້​ບໍ​ລິ​ການ, ການປະສານງານກັບພະແນກ ແລະ ພາກສ່ວນອື່ນໆ ພາຍໃນແຂວງຕາມສາຍຕັ້ງ-ສາຍຂວາງໃຫ້ກົມກຽວກັນ ເພື່ອໃຫ້ທຸກການພັດທະນາທາງດ້ານ ໄອຊີທີ ເຂົ້າເຖິງປະຊາຊົນຢູ່ຂັ້ນພື້ນຖານ.

ພ້ອມນີ້, ທ່ານຍັງໄດ້ເນັ້ນໜັກໃຫ້ ຂະແໜງການ ປທສ ສືບຕໍ່ ຍົກສູງພາລະບົດບາດການຄຸ້ມຄອງມະຫາພາກ ແລະ ຄຸ້ມຄອງໂຄງລ່າງເຕັກນິກ, ໂດຍສະເພາະ ວິໄສທັດຮອດປີ 2030, ແຜນຍຸດທະສາດຮອດປີ 2025 ແລະ ແຜນພັດທະນາ 5 ປີ 2016-2020 ຊຶ່ງປະຕິບັດມາແລ້ວ 3 ປີ ໃຫ້ບັນລຸຕາມຄາດໝາຍທີ່ວາງໃວ້. ເອົາໃຈໃສ່ໂຄສະນາເຜີຍແຜ່ບັນດານິຕິກໍາທັງກົດໝາຍ, ລຸ່ມກົດໝາຍ ດ້ານໄປສະນີ, ໂທລະຄົມມະນາຄົມ ແລະ ອິນເຕີເນັດໃຫ້ຄົບຊຸດ ຄຽງຄູ່ກັບການປັບປຸງ, ສ້າງໃໝ່ໃຫ້ທັນກັບສະພາບ, ສືບຕໍ່ ສ້າງ ແລະ ປັບປຸງພື້ນຖານໂຄງລ່າງ ເຕັກນິກໃຫ້ມີປະສິດທິພາບ, ຄວາມໄວສູງ ແລະ ປອດໄພ ຮອງຮັບເຕັກໂນໂລຊີໃໝ່ ເປັນຕົ້ນ : ຂໍ້ມູນໃຫຍ່ (Bigdata), ບລອກເຊນ (Block Chain), 5G ເພື່ອກະຕຸ້ນການນຳໃຊ້ທີ່ເປັນປະໂຫຍດໃຫ້ກວ້າງຂວາງ ແລະ ທົ່ວເຖິງ ແຕ່ສູນກາງຮອດທ້ອງຖິ່ນ, ເຂດຫ່າງໄກສອກຫຼີກ, ໂດຍສະເພາະ ເຂດຈຸດສຸມພັດທະນາຂອງລັດຖະບານ, ເປັນຈຸດເຊື່ອມໂຍງກັບພາກພື້ນ ແລະ ສາກົນ ຕາມນະໂຍບາຍຫັນເປັນປະເທດບໍລິການທາງຜ່ານ(Land link), ຄຸ້ມຄອງຄື້ນຄວາມຖີ່ວິທະຍຸສື່ສານໃຫ້ເຂັ້ມງວດ ບໍ່ໃຫ້ມີຄື້ນແຊກແຊງຈາກຕ່າງປະເທດ ທີ່ເຮັດໃຫ້ລັດສູນເສຍລາຍຮັບ, ເອົາໃຈໃສ່ຊຸກຍູ້ບັນດາບໍລິສັດ ລັດວິສາຫະກິດ ຍົກລະດັບ, ຂະຫຍາຍເຄືອຂ່າຍເຕັກນິກ, ລະບົບການບໍລິການ ທີ່ມີຄວາມອາດສາມາດແຂ່ງຂັນກັນສູງຂຶ້ນ ໃຫ້ສາມາດຂະຫຍາຍທຸລະກິດໄປຕ່າງປະເທດໃນອານາຄົດ ໂດຍສະເພາະ ແມ່ນການປະຕິບັດພັນທະໃນການປະກອບສ່ວນຢ່າງຕັ້ງໜ້າຕໍ່ພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ.

ນອກຈາກນີ້, ທ່ານປະທານຍັງໄດ້ເນັ້ນຕື່ມ ໃຫ້ເອົາໃຈໃສ່ເປັນພິເສດໃນການສ້າງບຸກຄະລາກອນ ທີ່ມີຄວາມຊ່ຽວຊານ, ຊໍານານງານດ້ານໄອຊີທີ ເພື່ອຕອບສະໜອງຄວາມຮຽນຮ້ອງຕ້ອງການຂອງໜ້າທີ່ວຽກງານໃນຂະແໜງການ ປທສ ແລະ ຂະແໜງການອື່ນໆຈາກສູນກາງຫາທ້ອງຖິ່ນໃນແຕ່ໄລຍະ, ປະກອບສ່ວນຕີຕ້ານສີ່ງຫຍໍ້ທໍ້ຕ່າງໆໃນການນຳໃຊ້ສື່ສັງຄົມອອນລາຍ. ສ້າງໃຫ້ບຸກຄະລາກອນມີຄວາມຮູ້ຄວາມສາມາດໃນການນໍາໃຊ້ອຸປະກອນເອເລັກໂຕຼນິກ ໃຫ້ທັນກັບການຂະຫຍາຍຕົວຂອງ ICT ແລະ ເປັນ​ເຈົ້າ​ການ​ໃນ​ການ​ໂຄ​ສະ​ນາ​ເຜີຍ​ແຜ່ວິ​ທີ​ນຳ​ໃຊ້​ທີ່​ເປັນ​ປະ​ໂຫຍດ ຂອງການ​ນຳ​ໃຊ້​ສື່​ສັງ​ຄົມ​ອອນ​ລາຍ ຄຽງຄູ່ກັບມາດຕະການແກ້ໄຂ ປະກົດການຫຍໍ້ທໍ້. ບັນດາຜູ້ປະກອບການ (ບໍລິສັດ, ລັດວິສາຫະກິດ) ຕ້ອງໄດ້ເອົາໃຈໃສ່ປະຕິບັດກົດໝາຍ ແລະ ລະບຽບການຕ່າງໆຢ່າງເຂັ້ມງວດ ເປັນຕົ້ນການປະຕິບັດພັນທະຕໍ່ລັດຖະບານ, ການຂະຫຍາຍເຄືອຂ່າຍຄວບຄຸມໄປສູ່ເຂດຊົນນະບົດ ຕາມທິດຊີ້ນຳຂອງລັດຖະບານ, ສ້າງ​ເງື່ອນ​ໄຂຫັນເປັນ​ທັນ​ສະ​ໄໝດ້ວຍ​ມາດ​ຕະ​ຖານ​ສູງ ເພື່ອ​ໃຫ້​ການ​ບໍ​ລິ​ການ​ແກ່​ສັງ​ຄົມ​ສະ​ດວກ, ວ່ອງ​ໄວ, ປອດ​ໄພ, ທົ່ວ​ເຖິງ, ມີ​ຄຸນ​ນະ​ພາບ​ສູງ ແລະ ລາ​ຄາ​ສົມ​ເຫດ​ສົມ​ຜົນ, ເຊື່ອມ​ໂຍງ​ເຂົ້າ​ກັບ​ພາກ​ພື້ນ ແລະ ສາ​ກົນ ​ໄດ້​ຢ່າງ​ມີ​ປະ​ສິດ​ທິ​ພາບ ພ້ອມທັງຍົກສູງບົດບາດ ສະມາຄົມ ໄອຊີທີ ໃນການເຕົ້າໂຮມກຸ່ມທຸລະກິດໄອຊີທີເຂົ້າຮ່ວມຂະບວນການສົ່ງເສີມການມີສ່ວນຮ່ວມລະຫວ່າງພາກລັດ ແລະ ເອກະຊົນ ຮ່ວມກັນສ້າງສິ່ງອໍານວຍຄວາມສະດວກໃຫ້ເກີດທຸລະກິດໃໝ່ (Startup) ແລະ SME, ຊຶ່ງແມ່ນນະໂຍບາຍໜຶ່ງທີ່ສໍາຄັນຂອງລັດຖະບານ ເພື່ອສະໜອງອຸປະກອນ ແລະ ການບໍລິການໃນລາຄາຖືກໃຫ້ແກ່ສັງຄົມ ໂດຍສະເພາະຢູ່ເຂດຊົນນະບົດຫ່າງໄກສອກຫຼີກ ແລະ ຊຸມຊົນທີ່ມີລາຍຮັບຕໍ່າ. ສັງລວມແລ້ວ ICT ແມ່ນເປັນປັດ​ໃຈໜຶ່ງ​ທີ່​ສຳຄັນ​ທີ່​ສຸດ​ ໃນ​ການປະຕິບັດ​ນະ​ໂຍບາຍຫັນ​ເປັນ​ອຸດ​ສາ​ຫະກຳທັນ​ສະ​ໄຫມຂອງ​ລັດຖະບານທີ່ທຸກພາກສ່ວນ ແລະ ທຸກທ້ອງຖິ່ນ ຕ້ອງ​ຮູ້ນຳໃຊ້​ໃຫ້​ເປັນ​ປະ​ໂຫຍດ​ຕໍ່​ການ​ດຳ​ລົງ​ຊີ​ວິດ ແລະ ຕໍ່​ພາ​ລະ​ກິດ​ແຫ່ງການປົກ​ປັກ​ຮັກ​ສາ ແລະ ສ້າງ​ສາ​ພັດທະນາປະ​ເທດ​ຊາດ ຕາມແນວທາງປ່ຽນແປງໃໝ່ຂອງພັກເຮົາ.